E dos rumanan Fingal ta dominando e categoria di Jr. Dragster na Aruba

jrdragster1

Jegando na e parti final di 2013 nos por mira atras un aña basta positive pa drag race y specialmente pa e categoria di Jr. Dragster cu a wordo inclui den e programa di IHRA Summit Super Series y aki na Aruba The Boss tambe a bai di acuerdo pa laganan core tanto pa e puntonan local di e Mio Wireles Point Series como tambe pa e IHRA Summit Super Series di Merca. E jui muhe di e conocido Junior Fingal a bin ta liderando e categoria y su mayornan a dicidi di bai pa e wild card na lugar di bai te Merca pa core e team finals pa wak si nan ta hanja un pase pa e World Finals. Lastimamente nan no a logra gana e wild card pero ainda e local point series no a termina y e dos rumanan Celine y Christine Fingal ta den un bataya pa wak cua di nan dos ta bai lidera y bira campeon den e categoria di Jr. Dragster. Pero e categoria aki a evoluciona y actualmente tin un total di 7 Jr. Dragster den e categoria y tin indicasion cu pa 2014 e categoria aki lo por conoce participantenan nobo y lo por amplia y jega 10 Jr. Dragster. E resultadonan di e Mio Wireless Point Series 2013 te na e momentonan aki ta como lo siguiente:

1) Celine Fingal – 740 punto
2) Christine Fingal – 690 punto
3) Leendrick Lacle – 600 punto
4) Micheal Angelo Wever – 530 punto
5) Reugene Eduarda – 440 punto
6) Jean Pierre Zimmerman – 390 punto
7) Casey Wever – 320 punto

jrdragster2 jrdragster3

E muchanan aki ta e futuro di e deporte aki y for di awor caba por mira cu tur 7 ta bin di teamnan di drag, di cual mayoria di teamnan di brommer pero tambe tin cu ta bin di teamnan cu tin auto. Esnan di teamnan di auto a laga sa cu pa 2014 e liderasgo lo cambia y ta e Jr. Dragsternan cu ta bin di teamnan di auto ta esnan cu lo bai domina e categoria aki. Importante ta cu e muchanan por diberti nan mes na un manera sano y den famia na Palo Marga. Diasabra awor 9 di November Jr. Dragster lo ta habriendo e programa di One Day Bracket November Edition un biaha mas y mesun caso lo ta dianan 29 y 30 di November durante di e Palo Marga Finals na unda nan lo core nan ultimo careda pa e Mio Wireless Point Series y pa Aruba hanja sa ken lo titular su mes campeon den e categoria Jr. Dragster.

Article by Palomarga PR