Palo Marga lo por conoce un comishon nobo pa dirigi e pista di drag di Aruba

20150527_210140

Despues cu pa un par di dia caba tin rumornan persistente ta coriendo rond cu The Boss Racing Foundation no lo sigui opera e pista di Palo Marga. E siman a habri cu un noticio positivo na momento cu un grupo di coredornan y ex coredornan di drag a dicidi di pidi un reunion cu e operadornan di pista pa asina wak kiko por wordo haci pa asina salba e operacion di Palo Marga y tene e pista di drag habri. Diaranson anochi e grupo aki a reuni cu The Boss Racing Foundation na Centro Deportivo Betico Croes unda nan a mustra nan preucupacion pero tambe cu nan lo tin hendenan dispuesto pa traha na bienestar di e deporte di Drag aki na Aruba. Di parti di The Boss Racing Foundation Sr. Lucho Werleman a mustra cu e sigur su persona no ta interesa mas pa sigui maneha e pista si e no por hanja judansa, pero si lo ta willing pa duna tur su cooperacion na e grupo di coredornan aki si nan kier tuma e operacion di e pista over. E grupo aki lo sinta otro siman un biaha mas cu The Boss Racing Foundation unda lo mustra na e grupo e relatonan financiero di e ultimo aƱanan como tambe un inventarisacion di e cosnan y equiponan cu lo mester pa asina por sigui opera e pista. Despues di esaki si ainda nan ta interesa pa tuma e operacion over, e grupo aki lo bai over na instala un comishon pa bai atende cu Palo Marga y Sr. Lucho Werleman ofiicialmente lo bai introduci nan na gobierno cu ta donjo di e pista conhuntamente cu un plan con nan ta pensa di rescata y upgrade e facilidadnan pa por garantisa continuacion di e deporte di drag aki na Aruba. Di parti di Sr. Werleman e la mustra cu e ta sumamente contento cu di parti di coredornan mes a sali un grupo cu ta willing pa tuma over e operacion di e pista y por lo pronto lo haci tur posibel pa tene e facilidadnan habri y lo duna e comishon aki tur su apoyo den e parti transitorio pa asina e amantenan di drag por sigui disfruta di nan deporte preferi. Pa loque ta trata e schedule di Palo Marga esaki lo sigui core normal te ora cu e comishon nobo ta cla pa tuma henter e operacion over y despues di esey nan lo mester informa si ta sigui normal of lo bai sera e pista pa un temporada pa asina trabaonan di upgrading por tuma lugar.