Palomarga Situation Update!

Updated: April-05-2019

Awe tardi nos di RaceJunkies.com a wordo invita pa forma parti di un reunion caminda lo elabora y contribui pa e futuro di nos deporte esta drag-racing y nos pista Palomarga.

E reunion a wordo jama pa Minister Otmar Oduber y Minister Dangui Oduber. Mininster Otmar ta encarga cu e terreno di Palomarga y Minister Dangui cu e deporte di drag-racing.

Por bisa cu un stap a wordo hasi den un direcion. Si esaki ta e direcion corecto lo nos wak y sigi esaki di serca. E propuesta di Minister Dangui ta pa lanta un federacion cu lo inclui 1 persona di cada ministerie y un persona di cada sport cu lo cay bow di esaki. Drag-Racing, Drifting, Karting y Motorcross. Tur e 4 deporte nan aki lo hasi uso di e Motor Complex; Palomarga.

E siman venidero aki un comision chikito cu a wordo forma den e reunion lo bai Palomarga pa hasi un inventario y wak e estado actual di e pista. Cu intencion cu aki 2 siman lo firma un MoU cu e Federacion nobo aki pa asina tur cos por cuminsa cana. 
E dos mandatario nan a sigura si cu nan kier pa tur actividad di drag continua of mihor bisa cuminsa di nobo.

Ban spera nos pista por habri mas liher posibel…

Photo by Huzam Koolman


Video di Minister Otmar Oduber splicando situacion actual.
Video di Minister Dangui Oduber splicando situacion actual.

April 05, 2019 UPDATE

UPDATE info Pista di Palomarga.

Bishita di observación awe na Pista di Palomarga.

Awe diabierna a tuma lugar un bishita di observación na Pista di Palomarga. E bishita aki tabata consistí di tur esnan envolvi den e deporte di motor. Den reperesentacion di dragracing tabata tey sr. Joy Werleman, Sr. Roland Arends, Sr. Oliver Vieira representando Motocross, Sr. Jasón Fun reperesentando Drifting, Sr. Gregory “Gordo” Tromp representando Karting, representantenan di DTI, DOW, ELMAR y DIP.

A caba rond inspecciona y tuma nota di kico por y kico no por wordo drecha riba corto y largo plaso. Entre otro cambionan di generator pa coriente kico ta e posiblidadnan. Bin cu planan concreto y structura pa cada deporte. Tur hende sa cu e Pista no ta den su mihor forma pa sigui practica e deporte di motor cu ta dragracing. Tur esakinan awe a bin dilanti.

Tur esnan envolvi di cada deporte a pone nan mes na altura y haya un bista di kico por ta e posibel cambionan riba E Pista di Palomarga. Tur esnan envolvi cu e diferente deporte di motor mester tin un idea y un bista di kico por ta e posibel cambionan na e Pista cu ta regarda cada deporte. Mester bai presenta un “schets” con un Pista di Kartin, Drift y Motocross lo mester bin. Kico por ta e cambionan realistico pa por realisa cada deporte den un solo compleho. Mester wak si tin espacio pa ampliación den dado caso cu mester yega asina leu.

Di parti di DIP nan lo bai percura pa un plattegrond di pista di Palomarga pa asina mira si tin espacio suficiente pa acomoda tur e deporte nan aki Na momento cu tur esnan envolvi presenta nan idea.

E meta ta pa traha hunto y yega na e mihor solución posibel pa cada deporte.

Durante di e bishita di observación aki na Pista di Palomarga a bin dilanti diparti di esnan envolvi den cada deporte di motor ta hopi contento y ta subraya cu ta pa prome biaha nan ta hayando e atencion mereci cu nan tabata busca pa decadanan.

Pronto lo bin bek Na Mesa pa mira tur idea, plan, proposicion y posiblidadnan pa sigui engrandece y yega Na un forma structura pa tur desporte di Motor den un solo compleho.

Texto di Maduro Randy di Nitroxx Aruba